ضلع نوشکی کا قدیم تعلیمی ادارہ گورنمنٹ بوائز ڈگری کالج اساتذہ کی شدید کمی کے باعث تعلیمی بحران کا شکار ہے، جہاں تقریباً 700 طلباء زیر تعلیم ہیں۔ 1970ء میں قائم ہونے والے اس کالج میں 75 اساتذہ کی ضرورت کے مقابلے میں صرف 30 اساتذہ تعینات ہیں، جبکہ 45 اسامیاں خالی پڑی ہیں۔کالج ذرائع کے مطابق کیمسٹری، میتھمیٹکس، سوشیالوجی اور اکنامکس کے شعبوں میں ایک بھی استاد موجود نہیں، جبکہ ہسٹری، زوالوجی اور فزکس میں صرف ایک، جبکہ باٹنی میں دو اساتذہ خدمات انجام دے رہے ہیں۔اساتذہ کی کمی کے باعث موجود لیکچرارز پر تدریسی بوجھ بڑھ گیا ہے۔ بی ایس پروگرام کے اجرا کے بعد بعض اساتذہ کو روزانہ پانچ سے زائد کلاسز لینا پڑ رہی ہیں۔ اساتذہ کا کہنا ہے کہ اضافی بوجھ سے تدریسی معیار متاثر ہو رہا ہے۔طلباء نے بھی صورتحال پر تشویش کا اظہار کرتے ہوئے کہا ہے کہ کئی مضامین کی باقاعدہ کلاسز نہیں ہوتیں، جس سے ان کی تعلیمی تیاری متاثر ہو رہی ہے۔کالج کی عمارت بھی خستہ حالی کا شکار ہے، تاہم نئی عمارت کی تعمیر جاری ہے۔ دوسری جانب انٹرنیٹ سہولت نہ ہونے کے باعث طلباء اور اساتذہ جدید تعلیمی وسائل تک رسائی سے محروم ہیں۔ کالج انتظامیہ کے مطابق پی ٹی سی ایل کو متعدد شکایات کے باوجود مسئلہ حل نہیں ہو سکا۔
